WANAFUNZI WA KOZI YA AWALI YA JESHI LA AKIBA WAPATIWA ELIMU YA HABARI

Posted on: July 4th, 2025

Halmashauri ya Manispaa ya Geita kupitia Kitengo cha Mawasiliano Serikalini leo tarehe 04 Julai, 2025 kimetoa elimu ya Habari na Saikolojia kwa Wanafunzi wa kozi ya awali ya Jeshi la Akiba yanayoendelea katika Kata ya Kalangalala, ikiwa ni sehemu ya mkakati wa kuwajengea uwezo wa kitaaluma na kisaikolojia ili kutekeleza majukumu yao kwa ufanisi na weledi katika mazingira mbalimbali ya kijamii na kijeshi.

Akizungumza wakati wa utoaji wa elimu hiyo, Kaimu Mkuu wa Kitengo cha Mawasiliano Serikalini, Ndg. Justine Mbilinyi amesema kuwa kwa hali ya sasa, askari anahitaji si tu ujuzi wa kijeshi, bali pia uelewa wa kina kuhusu Elimu ya Habari na kufahamu mienendo ya binadamu kupitia saikolojia ya msingi.

“Vyombo vya habari ni nguzo muhimu katika jamii yoyote inayolenga maendeleo ya kisiasa, kiuchumi, kijamii na kitamaduni hivyo elimu ya habari itawasaidia  kuelewa umuhimu wa mawasiliano sahihi, matumizi ya vyombo vya habari, na tahadhari dhidi ya taarifa za upotoshaji” alieleza Mbilinyi

Naye, Mpiga Picha wa Halmashauri ya Manispaa ya Geita, Ndg. Damasen Leonard akiwasilisha mada ya Saikolojia amesema,

"Elimu ya saikolojia inawapa uwezo wa kutambua hali za kiakili na kihisia za watu, hali inayosaidia kujenga uhusiano mzuri baina ya askari na jamii"

Ndg. Damasen ameongezea kusema, Askari wa Jeshi la Akiba ana nafasi kubwa katika kuleta utulivu, usalama na mshikamano wa kitaifa. Ili kutimiza wajibu huo kikamilifu, ni lazima awe na uelewa mzuri wa saikolojia ya watu na pia aweze kutofautisha kati ya jambo sahihi na lisilo sahihi katika utekelezaji wa majukumu yake. Nidhamu, weledi, uadilifu na huruma ni nguzo za mafanikio kwa askari yeyote anayetaka kulitumikia taifa kwa heshima.

1. Katika mafunzo haya mada zilizofundishwa ni pamoja na:
2. Historia ya vyombo vya habari kuanzia kipindi cha ukoloni hadi zama za kidijitali.
3. Umuhimu wa vyombo vya habari wakati wa amani na wakati wa vita.
4. Kufahamu namna ya kutoa na kupata habari kutoka kwa wananchi.
5. Saikolojia ya watu na umuhimu wa kujua mambo yanayopaswa na yasiyopaswa kufanywa na askari wa jeshi la akiba.

Akizungumza kwa niaba ya Mshauri wa Jeshi la Akiba Wilaya ya Geita na wanafunzi, MT 82691 Drill SGT wa kozi Simon Lazaro Byejwe katika Wilaya ya Geita ambaye ni Msaidizi wa Mshauri wa Jeshi la akiba wamekishukuru Kitengo cha Mawasiliano kwa Elimu waliyoitoa na kufurahishwa na masomo hayo, akisema kuwa limewasaidia kujitambua, kujenga uwezo wa mawasiliano bora, na kupata maarifa yatakayowasaidia ndani na nje ya jeshi.

MATUKIO MBALIMBALI KATIKA PICHA

TUFUATILIE KATIKA MITANDAO YETU YA KIJAMII
Instagram

Facebook

X

Youtube